7مارسْ

ارْسَى يَا رَاسِي أرْسَى
وتفكَّر قبلْ مَا تنْسَى
غدَّا8مارسْ
8مارسْ
عيد النسَا
خمَّم يا راسِي خمم وعِيدْ
لمَنْ تقُول مبروكْ ..
ولمنْ تهْدِي وردْ العِيدْ .
8مارسْ
اهْدِي وردَة ..
نقُولَكْ اهْدِي جَرْدَة
لدِيكْ لكُل صبَاحْ توقَفْ
تشُوفهَا فالمُوقَفْ
تحقرهَا أنتَ ..
ملِّي أنتَ توقَفْ
ديك لمَن حَرْ الزمَانْ ..
خَارجَة هرْبانَه
تخدمْ في كُلشِي ..
وتقُولك أنَا صبَّانَه
تصبَعْ ع الكُرْفِي
تصوَّر خُبز حَرْفِي
شكون ارحمها .. وشكون ارْحَم اوْلادهَا
بَاعتْ م لحَمها .. وما باعَتْشْ بلادها
دِيك لكُل صباحْ ..
تشُوفها وأنتَ بعيدْ
قرب اهديها وردة ..
وقُولْها مبْرُوكْ الْعِيدْ .
ولديكْ لطَالبتْ بحقهَا ..
قلتْ الْحُرِّية من حقهَا
وصَانتْ قدامنا حقُوق
دِيك لبْغَاتْ بلادها
تزْهَى …
تزْهَى وتكُون لفُوقْ
تعذبتْ وتسَجْنَاتْ
دِيكْ الزِّينة ..
دِيك لعْرُوسَة فلبْنَاتْ
دِيك لحْمَامَة لِماتتْ فالسَّجْنَاتْ
دِيك لِحفَّاتْ الصبَاطْ ..
وتمشاتْ فالحبسْ بالقرقَابَة
دِيك لتولدَتْفْحْزَابْ ..
دِيك لِكبْرَتْ فالنقَابَة
قرَّب بوس راسْها
جْذبْ حثى أنتَ فعراسْها
عندها وعد ..
عندها مع لفجَرْ مواعِيدْ
اهديها وردة ..
وقُولْهَا مبْروك الْعِيدْ .
ولدِيك ..
لمشاتْ وجاتْ
زَنْقَتْ وحشَّاتْ
ماذا عسَّتْ واحضَاتْ
دزَّتْ صُوفْ .. قَرْقَتْ بَيْضَاتْ
حلْبتْ وُروْبَتْ ..
نصبَتْ الشكْوَة وُ مَخْضَاتْ
دِيكْ لِتكفَّحْ زهرهَا ..
دِيكْ لِبْقَلَّتْ الزهَرارْضَاتْ
دِيكْ لِسْقاتْ وُحصْداتْ
قالُو الهَمْ سَالاَ ..
وُهِيَّ فالهم عادْ بداتْ
صَبْنَتْ ..
وُ نشْرَتْ هدُوم عْلَ الشْطَبْ
هزَّتْ شاقُورْ .. شلْخَتْ حْطَبْ
امشَاتْ عْلَ الشُّوك .. جاهَا الشوك ارْطَبْ
دِيك لعَرْقَتْ .. ديك لبرداتْ
اهديها وردة ..اهديها ورداتْ
اهديها وُعِيدْ
وقُولهَا مبْروك ..
مبروك الْعِيدْ .
ولدِيكْ ..
لِمشْطُونَة .. وُغَارقَة فالاذْكَارْ
وديكْ لِقُدَّامِي فالبارْ ..
طلبتْهَا وِيسْكِي .. زَادَتْنِي رِيكَارْ
وحكات لِي شْوِي من قصتها ..
تقولْ موجَة بين الامواجْ
معَ بحَرْ .. كان امواعدها بالزواجْ
معَ خطوة ..
معَ رجلْ بداتْ تعْوَاجْ
شفتهَا ملاكْ .. والنَّاسْ واصْفينهَا قرْدَة
أنا اهدِيتْها من عندي وردة ..
وُقُلْت لهَا ..
مبْروكْ الْعِيدْ .
9مارسْ
صَبحَتْ امْرا فالمُوقَفْ
شَفْتِ مُولاتْ الوردة
فبَابْ الجرْدَة
المسكينة هازَة وردة
ارجلْ حفيَانَة .. وُ رجلِ بلا فرْدَة
تجرِي .. وُيجْرِي وراها مَرْدَة
يجري وُهازْ اعصَاتُو ..
حِيثْ حُكُومتْنَا وصاتُو ..
يجري .. يجري ويْزيدْ
يوصَلْ لهَا .. اعْصَاتْ الْعِيدْ .
9مارسْ
امرا هَازَة وردة ..
صَابرَة للهَمْ دِيمَا ..
بغَاتْ تشَمْ اهْوَى جديدْ ..
لاَحَتْ ريَّتْها لَقْديمَة
9مارسْ
امرا فالْكُونطوارْ
تمسحْ دمعَة .. سرْدَتْ مشْوَارْ
طلبتهَا كاسْ وِيسكِي ..
زَادتنِي واحَد رِيكَارْ
9مارسْ
اخْرجْ منْ ذاتَكْ
شُوف النَّاسْ .. مَالْ ضحكتهُمْ نَصْلاتْ
سَاعَدْ النَّاسْ .. لِفديقْ الحَالْ حَصْلاتْ
سوَّلْ ع الوردَة .. سوَّلْ ع لَمْرَا فين وصْلاتْ .